Nilidhani

Nilidhani ya kuwa, nahitaji mapesa

kumbe ilikuwa, kupata watu sasa

Utajiri ni kuwa, kichwa ukipapasa

Hapa nilipo sasa, shukrani nazitowa

Nilidhani ya kwamba, sinayo familiya

Nashangaa ya kwamba, meshindwa hesabiya

Nyote 'mefika kwamba, mpenzi kunipeya

Mola namsifiya, umati kutokewa

Nilidhani ya kwamba, siku ino ajabu,

Miguu tungetamba, na wangu muhibu

Ma'nake mi mshamba, magari kwetu bubu

Hatunya la aibu, Maulana kaumba

Nilidhani ya kuwa, ili yawezekane

Lazima kufikiwa, mishahara minene

Nimikwishatambuwa, bora uridhikane

Hebu nifundhishane, kwanyu wadogo hawa

Nilidhani ya kwamba, wote hufurahiya

Mema yakikupamba, wengineo huliya

Machozi ni ya mamba, laana wakutiya

Hatutawahofiya, Macho tutayafumba

Nilidhani ya kuwa, maisha kiyatima

Kaburi tachimbiwa, Nikosewe uzima

Alaa nishapewa, uhai na heshima

Mishale wakifuma, imani nakingiwa

Nilidhani ya kuwa, leo haingefika

Kahofu kuachiwa, jumba likinicheka

Lo! Nimeneemewa, lipi lisowezeka?

Humu tu nkitoka, nyota namulikiwa