JIPE SHUGHULI

Lewa: Nikukanye mara ngapi, yaache maisha yangu

Sijui wataka vipi, hivi kwenye raha yangu

Dawa kwangu ni mshipi, kukaza ubongo wangu

Mwenzangu jipe shughuli, nione chako kisogo

Ewa: Si kwamba nakuchakura, ili usifurahike

Nawazia kila mara, hiroin yaunda hiro

Ina makubwa madhara, akilini mishipani

Dawa zote za kulevya, wachana hizo ni sumu

Lewa: Po! Po! Po! Po! Po! Lia! Sauti yako yakera

Maneno yanuka pia, mbona n’kapita huku

Mimi ndiye baharia, tazidi kuogelea

Mwenzangu jipe shughuli, nione chako kisogo

Ewa: Zaathiri masomoni, wazembea na kufeli

Kisha baada’ shuleni, ushindwe kupata wana

Au waje vilemani, ulaumu Maulana

Dawa zote za kulevya, wachana hizo ni sumu

Lewa: Tangu lini nauliza, ukawa kwangu mzazi?

'Likuwa kunikuza,  watokea saa hizi

Cha mdomo kuingiza, wanionya nimaizi

Mwenzangu jipe shughuli, nione chako kisogo

Ewa: Wewe na hao wenzio, harufu zenu beberu

Mimi naishi kilio, babangu kazi kafutwa

Nguvu zi’mtoka mbio, kwa pombe kamwaga unga

Us’one nakosa karo, ukadhani ni kupenda

Lewa: Tuanze humo darasa, nyani haoni kundule

Hesabu wewe ni tasa, bangi yanisaidia

Nikipiga kombe busa', utamu umo nyongoni

Mwenzangu jipe shughuli, nione chako kisogo

Ewa: Sikiza hili muhimu, ninachojali ni kuwa,

Werevu wako udumu, kesho utahitajiwa,

Sayansi twasoma humu, atharizo twatajiwa

Dawa zote za kulevya, wachana hizo ni sumu

Lewa: Nawe hujamakinika, yoyote ino miaka

Kazi shule hujashika, mbona testi  zafanyika

Hatusomi kweleweka, alama kuimarika

Mwenzangu jipe shughuli, nione chako kisogo

Ewa: Kuber changáa kokeni, zote hizo tu ni vifo

Wajiona  u sawani, jipe miezi ijayo

Humumu  mwako bongoni, mtakuwa ja masizi

Dawa zote za kulevya, wachana hizo ni sumu

            Kwa mama pima ukenda, hata darasa 'kakosa

Pombe chafu ukawinda,  nambie huko sikufa?

Wakumbuka hizi kanda, Embu Nyeri  kuliwaje?

Dawa zote za kulevya, wachana hizo ni sumu

Lewa: Umetaja sehemuzo, mwenzio nikakumbuka

Amu yangu ni muozo, vilio tulimzika

Naona lako ni wazo, la busara ya kusaka

Wasia  si shinikizo, nataka kubadilika

Nachukua uwamuzi, nianze kuishi tena

Nimekuwa usingizi, kutoona tahadhari

Ila leo ni uzinduzi, nainza safari mbpya

Wasia wala si shinikizo, nafikiri kubadilika

Lewa na Ewa: Ujumbe twawatoleya, macho mkiyakodoa

Aibu kuj'epushiya, nchi kujijengea

Baba mama na jamiya, kabila zote tokea

Kazi ni kuamkiya, kulipinga nduli hili!