MAISHA MABANDANI

Ni madongoporomoka, nakuta nimezaliwa

Vyumba vingi ja vichaka, uvundo nimelaziwa

Popote pale majitaka, pasi unyevu ni chawa

Maisha ya mabandani, ni lini tabadilika?

Chakula si cha kulika,  rangiye ni ya kutisha

Ni sumu hata kwa paka, tena si cha kushibisha

Uhai wetu hakika, ni ule wa ‘bahatisha.’

Maisha ya mabandani, ni lini tabadilika?

Watoto wanapofika, miaka miwili ya’ni

Afiya kuzoroteka, kwetu sio jambo geni,

Bila Mungu kuwaweka, huondoka duniani

Maisha ya mabandani, ni lini tabadilika?

Na tena kuelimika, ni kwa kimiujiza tu

Shule zetu husifika, pengine kwa mabaya  tu

Walimu huwa viraka, mafunzo wachezea tu

Maisha ya mabandani, ni lini tabadilika?

Endea kazi kusaka, kwani umefuzu sasa

Wasifu umeandika, tumaini huwa tasa

Karani naye atamaka, ulilelewa mkasa

Maisha ya mabandani, ni lini tabadilika?

Fununu zinapofika, kule…mjini ku’mwizi

Au mwivi katoroka, washuku sehemu hizi

‘Kachero atatumika, kuchakura makaazi

Maisha ya mabandani, ni lini tabadilika?

Ati ni mtaa duni aka! Ila sikiliza hili

Mabwanyenye wausaka, kutaka kuubadili

Faida si yetu shika, kumbe wanavyo vibali

Maisha ya mabandani, ni lini tabadilika?

Kwa miaka na mikaka, jamii zimesumbuka

                                                 Wakati unaitika, kuwamba ukingo umefika

Tosha! Kudharaulika, sisi ni watu kumbuka!

Maisha ya mabandani, ni lini tabadilika?

Na Balozihumu

Douglas Ogutu

douglasogutu@gmail.com