Kwa Mwanangu

Soma hii kwa makini, ikufae na akili

Nikujuze kwa yakini, maisha mwendo ya mbali

Kufaulu ‘mu duniani, kwataka uwe mkali

Barua naiandika, ikufikie mwanangu

Maono yawe mpini, yashike kila pahali

Jichunge na hayo maoni, yao wasiokujali

Uyachunge hadharani, ubakishe ya muhali

Barua naiandika, ikufikie mwanangu

Anza kushika imani, usiogope kejeli

Nafsi il’o na amani, hupasua majabali

Jishawishi kwa undani, ushindi ni akili

Barua naiandika, ikufikie mwanangu

Ukimpata mwendani, aelewe yako hali,

Mwonyeshane safarini, muwe wenye maadili

Jiepushe  hatarini, msiwe ja mabahili

Barua naiandika, ikufikie mwanangu

Kuna ujinga fulani, ulio kila mahali

Kukaa pale pembeni, na kungoja kazi nzuli

‘Mekaza tai shingoni, ‘kitarajia asali

Barua naiandika, ikufikie mwanangu

Najua pale shuleni, ulitambulika fahali,

Alama zako tisini, hazikukosa kibali

Sasa waona uhuni, walimwengu ni katili

Barua naiandika, ikufikie mwanangu

Ondoka barabarani, uhimize wako mwili,

Vitamu kwa sasa deni, ukisaka raslimali,

Ujijengee maskani, yajayo kihalali

Barua naiandika, ikufikie mwanangu

Picha: Acoustic Moca