Mapenzi Safari

Mwenzio nina mashaka, maarifa nikisaka,

Hili sio la kucheka, laana au baraka,

Ni vipi yaeleweka, mada ino kuishika,

Mapenzi yakitoroka, si mchezo kushikika

Mimi nimesaidika, mafunzo niliyotaka,

Kwangu imetambulika, penzi ni mbio za nyika,

Likija halitabweka, taratibu hujiweka

Mapenzi yakitoroka, si mchezo kushikika

Hayachoki kuzunguka, mradi yaje kufika,

Yenyewe hujipeleka, siri bila kusifika,

Si rahisi kukereka, hii ndiyo kubwa shaka,

Mapenzi yakitoroka, si mchezo kushikika

Mapenzi si mtu

Wala si kitendo

Penzi ni safari

Masafa marefu!

Huwa mithli ya mzuka, au kiza cha kichaka

Binadamu hupumbazika, akaanza kanganyika,

Tamaa yake haraka,akachokora ja taka,

Mapenzi yakitoroka, ni vipi yatashikika?

Mja hudanganyika, na ghere ikambaka,

Upendo akauzika, kiuwekea mipaka,

Dah! Pole wamponyoka, bila ya kulalamika,

Mapenzi yakitoroka, ni vipi yatashikika?

Kwa heshima yaondoka, tazama mito yanavuka,

Utakapoerevuka, mapendo yameraruka,

Mwenzangu kibahatika, siyafanye kuteseka

Mapenzi yakitoroka, ni vipi yatashikika?

Mapenzi si mtu

Wala si kitendo

Penzi ni safari

Masafa marefu!