KARANI

Karani ungalijua, machungu yangu maisha

Kwa kweli hiyo barua, niloleta unga'fikisha

Mwenzio ni taabani, kazi natafuta kwisha

Swali nauliza kwako, mbona moyo huna kweli?

Karani miaka mingi, nimo humu vitabuni

Tumaini 'nalo kwingi, ajira tapewa lini

Sitaki kujuta mengi, kumbe nisingesomani

Swali nauliza kwako, mbona moyo huna kweli?

Karani pia kumbuka, wakati ukiisaka

Kwake Mola ukapeka, kukuja'lia kushika

Hayo kusahaulika, wengine kutowataka

Swali nauliza kwako, mbona moyo huna kweli?

Karani ama ni lile, jina langu la pili

'Litambua mara pale, 'kabila langu si hili'

Nilidhani ni ya kale, bado majina ni makali

Swali nauliza kwako, mbona moyo huna kweli?

Karani au pengine, kisomo changu cha juu

Kilifanya ujichune, hulka zako kuu kuu

Uzembeni sipendane, kahofu kuvunjwa 'guu

Swali nauliza kwako, mbona moyo huna kweli?

Karani hebu fikiri, ninaishi kifukara

Kijumba pasi manthari, mazuri si masihara

Jana sikula si siri, sema sina mshahara

Swali nauliza kwako, mbona moyo huna kweli?

Karani mimi mwenyewe, kwa mkuu nilikuja,

Asubuhi leo wewe! Mambo ni kangaja huja,

Wasifu wangu apewe, karidhia zangu hoja,

Swali nauliza kwako, mbona moyo huna kweli?

Karani ujue hasa, naripoti kazi kesho,

Hali ni halisi sasa, mie bosi wako kesho

Nisingependa kisasi, bali nakusihi badilika

Swali nauliza kwako, mbona moyo huna kweli?