MBAWA

Asubuhi nikitoka, kuenda kazini

Na mke wangu kufika , kando na njiani, 

Ndege ukanipa shaka , ku’nyea kitwani, 

Kumbe hoja sio nguvu, muhimu ni mbawa

Ukiwa juu ya mti, haja kumaliza

Swali umenipa eti, hekima najaza

Hakuna lazima cheti, anga kuicheza

Kumbe hoja sio nguvu, muhimu ni mbawa

Haki nilitaka sana, shika mkononi

Hadi usiishi tena, nimpe mwandani

Jioni tukipatana, ujute sahani

Kumbe hoja sio nguvu, muhimu ni mbawa

Pia nikafikiria, heri ningekuwa

Nazo kushoto kulia, nisingechelewa

Kelele ngeepukia, kazi kuzomewa

Kumbe hoja sio nguvu, muhimu ni mbawa

Maulana tafadhali, nakuomba mbawa

Nami nitapaa ili, fedheha nihepe

Ninayo mengi ya mbali, dunia niipe

Kwani hoja sio nguvu, muhimu ni mbawa

©Balozihumu