MWIBA

Je unakumbuka, mimi na mamako

Tulipokushika, bila ya viboko

Ila tulimaka,  kwa kufoka kwako

Mwiba kijidunga, huambiwi pole

Tuliwajibika, kukuonya huko

Kusihi pulika, unda maisha’ko

Waona twataka, kutawala kwako

Mwiba kijidunga, huambiwi pole

Nd’o umeamka, na malalamiko

Dunia geuka, kukufanya cheko

Umeshagutuka, huo ni mwamko

Mwiba kijidunga, huambiwi pole

Onya wanarika, na wadogo zako

Ujana huwaka, poza miondoko

Sema ulifika, ‘kafanywa vituko

Mwiba kijidunga, huambiwi pole