AKINA KANYARI

Kwanza naulizia tu, hayo majina daktari

Nabii mtume wetu, uliyapata kwa ari?

Na sasa hivi ni vitu, gani jamani ukiri

Ninyi akina Kanyari, Yehova awarehemu

Imani inachezewa, na hao mbwa wa mwitu

Wakristu mwalaumiwa, macho yenu yana kutu

Madhabahu yamejawa, ya kuaibisha watu

Ninyi akina Kanyari, Yehova awarehemu

Nyumba yake Baba yangu, ilifaa ya maombi

Sarakasi nzima chungu, za kujazia vitambi

Mbona kumuudhi Mungu, hivi kwa vingi vitimbi

Ninyi akina Kanyari, Yehova awarehemu

Pia nyinyi waumini, wakusaka miujiza

Nawasaili lakini, mnalipenda sana giza?

Aibu kubwa yaani, kwenu mkijitokeza

Ninyi akina Kanyari, Yehova awarehemu

Hajasema Yesu wazi, Roho yupo ‘takatifu

Kuwatambulisha wezi, nyoyoni muwakashifu

Mwangoja jicho pekuzi, muone mlivyo wafu

Ninyi akina Kanyari, Yehova awarehemu

Tuliposema ya kweli, “pandia mbegu” ni sumu

Mkadai kulihali, kuacha ndivyo vigumu

Eti siye tuko mbali, kupata Baraka humu

Ninyi akina Kanyari, Yehova awarehemu

Nasema tena nawika, matendo ya huyu Mola

Yasije  kutupeleka, kuabudu Bwana ila

Damu ilotiririka, maisha kutulokola

Ninyi akina Kanyari, Yehova awarehemu

Kakangu Mohammed Ali, heko kazi yako hiyo

Sifazo kila mahali, hata uongezwe cheyo

Bali hebu jibu hili, umesafi’ maishayo?

Ninyi akina Kanyari, Yehova awarehemu

Siku yenyewe ijapo, mja na ajue pake

Jiicho la Mola  lipo, kutezama v’umbe wake

Wakati huo ujapo, hakuna kuhepa kwake

Ninyi akina Kanyari, Yehova awarehemu

  

Tamati enyi wenzangu, hebu tuwache uzembe

Tusome hivi vifungu, biblia na itupambe

Enzi hizi za utungu, tuwachane na vijembe

Ninyi akina Kanyari, Yehova awarehemu