BURUNDI AVUJA

Haloo mama Afrika, nisemalo walijua

Lakini sikio shika, macho naomba fumbua

Yupo mwana a’yewika, damu yake yasumbua

Burundi avuja

Haloo mama Afrika, wapenda maendeleo

Sasa unashughulika, mikutano ya mazao

Nakusihi nina shuka, umnusuru mwanao

Burundi avuja

Haloo mama Afrika, wapi waumini wako?

Wenye imani kushika, waswali kule waliko

Kwa Mola watasikika, bara lizibe vicheko

Burundi avuja

Nakwita mama Afrika, jiangalie vilivyo

Mambo yanaharibika, hadhiyo yaitwa ovyo

Wasema hujaimarika, kutawala ipasavyo

Burundi avuja

Ewe mamangu Afrika, tia kanga kiunoni

Katili kumsaka, asiyependa amani

Muonye kuheshimika, kwamba hupendi uhuni

Burundi avuja

Haloo mama Afrika,Wito nasema inuka

Familia yaumbuka, vazi lake lachanika

Mbiombio Tanganyika, bila kupumzika

Burundi avuja